Liverpool ayaa u calaamadeysatay tababaraha Brighton Roberto De Zerbi bedelka Jurgen Klopp haddii ay ku guuldareystaan soo xerogelinta bartilmaameedkooda koowaad Xabi Alonso, sida ay qortay The Guardian.
Klopp ayaa ka tagaya Liverpool dhamaadka xilli ciyaareedkan iyadoo Liverpool ay heysato waqti yar oo ay ku magacowdo bedelkiisa xilli ciyaareedka soo socda.
Alonso ayaa ah bartilmaameedka koowaad ee Liverpool ka dib wacdarraha uu ka dhigayo Bayer Leverkusenm kuwaasoo hogaanka u haya horyaalka Bundesliga, laakiin inuu aqbalayo dalabka Reds weli shaki ayaa ku jira.
Bayern Munich ayaa sidoo kale u tartameysa xiddigii hore ee khadka dhexe ee Liverpool iyadoo Thomas Tuchel uu ka tagayo Bayern dhamaadka xilli ciyaareedkan, waxaa iyadana jirta suurtogalnimo uu Xabi Alonso xilli ciyaareed kale ku sii joogo Bayer Leverkusen.
Liverpool ayaa u baahan qorshe labaad haddii ay weyso Alonso, waxayna haatan liiskooda ku darsadeen De Zerbi iyadoo liiska ay sidoo kale ku jiraan tababaraha Sporting Lisbon Ruben Amorim iyo tababaraha Jarmalka Julian Nagelsmann.
De Zerbi ayaa wacdarro dhigayay tan iyo markii uu ku biiray Brighton xilli ciyaareedkii hore, waxaana la aaminsan yahay inuu sidoo kale diirada u saaran yahay Manchester United haddii ay ceyriyaan Erik ten Hag.
Be the first to comment