Dhibaatada dhaawacyada ayaa kusii socota Chelsea, waxaana xalay uu dhaawac soo gaadhay kabtan ku-xigeenka Ben Chilwell oo u muuqday in uu muruqa wax weyn ka noqday intii ay socotay ciyaartii guusha ay ka gaadheen Brighton ee ay ugu soo gudbeen wareegga afraad ee Carabao Cup.
Ben Chilwell oo inta badan ahaa kabtanka Chelsea xilli-ciyaareedkan kaddib dhaawaca Reece James oo kulankii koowaad wax ku noqday, ayaa isaguna hadda galay liiska ciyaartoyda Blues ka maqnaanaya.
Mauricio Pochettino ayaa xaqiijiyey, in uu Ben Chilwell u saaray dhaawac soo gaadhay, sidaas daraadeedna uu ciyaarta ugu dhamaystay toban ciyaartoy maadaama uu wada isticmaalay beddelkii loo ogolaa.
“Miyuu Chilwell dhaawacan yahay? Haa.” Ayuu yidhi Mauricio Pochettino.
Waxa uu kusii daray; “Waxa aanu u baahanahay in aanu qiimayno xaaladdiisa berri [maanta], waxayse ila tahay in uu yahay muruqa.”
Blues ayaa waxa hore dhaawac ugaga maqnaa siddeed ciyaartoy oo ay ku jiraan saxeexyadii cusbaa ee Christopher Nkunku iyo Romeo Lavia, halka difaaca midig ee Malo Gusto uu isaguna ganaax ku maqnaan doono labada ciyaarood ee soo socda, sabab la xidhiidha casaankii tooska ahaa ee la siiyey kulankii Aston Villa.
Be the first to comment