Horyaalka waddanka Ingiriiska ee Premier League waxa uu bilaabmi doonaa badhtamaha bisha August ee foodda innagu soo haysa, waxaana markii shanaad oo xidhiidh ah inay ku guuleysato u dagaallami doonta Manchester City, hase yeeshee Arsenal oo laba sannadood oo isku xiga kaalinta labaad ku dhamaysatay ayaa iyaduna is-xoojinaysa xagaagan, halka Liverpool ay gashay xaalad kala guur ah oo uu ka tegay tababare Jurgen Klopp.
Waxa kale oo horumar samaynaysa Manchester United oo saxeexyo cusub isku xoojisay, halka Chelsea ay magacowday tababare cusub, sidoo kalena samaysay saxeexyo kale.
Khabiirka ciyaaraha Tony Cascarino ayaa saadaaliyey kooxda horyaalka Premier League ku guuleysan doonta xilli-ciyaareedkan, waxaana uu la saftay Arsenal oo uu sheegay in doorkan ay noqonayso naadiga aanay cidina ku qabsan karaynin kaddib laba sannadood oo ay gashay kaalinta labaad.
Arsenal ayaa laba xilli-ciyaareed oo xidhiidh ah waxa ay si adag ugu xafiiltantay horyaalka Premier League oo waqti dambe ay labada jeerba dhaaftay Man City, waxaanay beddeleen kooxdii Jurgen Klopp ee Liverpool oo sannadihii ugu dambeeyey ahayd kooxda Man City kula loollanta horyaalka.
Be the first to comment