Tababaraha cusub ee Barcelona ee Hansi Flick ayaa durba doortay saxeexiisa koowaad ee uu keenayo Barcelona, si xilli-ciyaareedka dambe ay u noqdaan naadi ku tartami kara horyaalka LaLiga iyo koobabka kale ee maxalliga ah iyo Champions League intaba.
Jimcihii maanta ayay Barcelona si rasmi ah u shaacisay inay shaqada ka eriday Xavi Hernandez oo Axadda lagu sii macasalaamayn doono ciyaartiisii ugu dambaysay ee uu tababarayo kooxda reer Catalonia, waxaanay heshiis la meel-dhigeen Hansi Flick
Tababarahan hore ee Bayern Munich ayaa dhaxli doona Barcelona oo xilli-ciyaareedkan aan wax koob ah ku guuleysanin, waxaana u taalla shaqo adag oo ah inuu dibu-dhis ku sameeyo oo uu ka xoojiyo meelaha ay ka liigayeen.
Wariyaha ciyaaraha Matteo Moretto ayaase ogaaday ciyaartoyga uu Hansi Flick ka dhiganayo saxeexiisa koowaad, waana laf-dhabarta Bayern Munich ee Joshua Kimmich oo hore loo sheegayey inay Barcelona doonayso inay la saxeexato.
Matteo Moretto oo qraal ku daabacay bartiisa bulshada ayaa yidhi: “Kimmich ayaa ah ciyaartoyga uu Flick sida dhabta ah u jecel yahay. Waxa aan xaqiijinayaa inuu xiisaynayo inuu la saxeexdo.”
Kimmich oo qandaraaskiisa Bayern Munich uu sannad ka hadhsan yahay ayaa muddooyinkii dambeba la isla dhax-marayey inuu doonayo inuu ka tago Allianz Arena, waxaana kooxaha lala xidhiidhinayey ku jiray Barcelona, Manchester City iyo Liverpool.
Be the first to comment