Xiddiga ka tirsan kooxda kubadda cagta Liverpool ayaa gaadhay go’aan lama filaan ah oo waji gabax ku ridaya tababaraha cusub ee kooxda kusoo waajahan ee Arne Slot.
Liverpool ayaa geli doonta waqti kala-guur ah oo uu baxayo shaqsiga ugu saamaynta badan oo ah Jurgen Klopp, sidoo kalena waxa albaabka waqti horeba la tusi doonaa Joel Matip, halka Mohamed Salah go’aan laga gaadhi doono oo aan la hubin kaddib siddeed sannadood oo uu joogay Anfield.
Mohamed Salah oo toddobaadkii mushahar uga qaata Liverpool lacag dhan £350,000 Gini ayaa waxa xagaagii hore £150 milyan oo Gini kusoo dalbatay Al Ittihad, taas oo mar kale la filayo in mar kale lagu soo rogaal-celiyo.
Sida uu ku warramayo wargeyska Anfield Watch ee kasoo baxa magaalada Liverpool ayaa waxa uu sheegay, in difaaca reer England ee Joe Gomez uu go’aansaday inuu iskaga tago kooxdaas marka uu dhamaado xilli-ciyaareedkan socda.
26 jirkan ayaa la sheegay in uu rumaysan yahay in aanu fursad ka heli doonin tababaraha cusub ee Arne Slot iyadoo marka horeba uu aad u hooseeyey waqtiga uu ka heli jiray kooxda.
Joe Gomez ayaa waxa xagaagii hore ku qanciyey inuu heshiis cusub saxeexo tababare Jurgen Klopp, waxaana hadda bixitaankiisu uu u yahay sidii inay uga dhamaatay Liverpool oo kale.
Be the first to comment