Kooxda kubadda cagta Manchester United ayaa la murugaysan dhaawac soo gaadhay xiddig muhiim ah saacado ka hor ciyaarta adag ee Liverpool ay ku martigelinayaan garoonka Old Trafford, kaas oo maqnaanshihiisa ay jamaahiirta Red Devils waqti dambe ogaadeen.
Tababare Erik ten Hag ayaa ku qasbanaan doona inuu isbeddel ku sameeyo khadka dhexe ee kooxdiisa, illaa haddana kooxdu ma aanay shaacinin muddada uu maqnaanayo ee ay xaaladdan ku jirayaan.
Xidhiidhka kubadda cagta Brazil ayaa saaka shaaciyey, in liiska xulka ay ka reebeen kubbad-burburiyaha Manchester United ee Casemiro oo dhaawac ah, kaas oo sidoo kalena aan kooxdiisa u ciyaari karaynin kulanka Liverpool.
32 oo dhaawac ku seegay 17 ciyaarood intii u dhaxaysay bilihii October illaa January ee xilli-ciyaareedkan, ayaa waxa uu saddexdii kulan ee ugu dambeeyey dheelay min 90 daqiiqadood, hase yeeshee waxa soo gaadhay dhaawac u diidaya kulanka Liverpool.
Ten Hag ayaa khadka dhexe ka ciyaarsiin doona Scott McTominay iyo Kobbie Mainoo, halka uu sidoo kale isticmaali karayo Sofyan Amrabat oo lumiyey kalsoonida tababarihiisa.
Si kastaba ha ahaatee, Manchester United ayaa waxa usoo laabtay Harry Maguire, Rasmus Hojlund iyo Aaron Wan-Bissaka.
Be the first to comment