Liverpool ayaa ciyaaryahan ka saartay liiskeeda ciyaartoyda ugu qeyb galaya Europa League ka hor kulanka Sparta Prague.
Liverpool ayaa dib u bilaabaysa ka ciyaaristeeda Europa League todobaadka soo socda iyada oo wajihi doonta kooxda Sparta wareega 16ka.
Reds ayaa u safreysa dalka Czech Republic 7-da Maarso ka hor inta aysan martigelin dhiggooda Maarso 14-keeda.
Kahor kulanka Sparta, Jurgen Klopp ayaa cusbooneysiiyay liiska ciyaartoyda u mataleysa Europa League.
Sida laga soo xigtay Liverpool Echo, Waxa uu liiska ka saaray Joel Matip, kaasoo garoomada ka maqnaan doona inta ka dhiman xilli ciyaareedkan ka dib markii uu dhaawac halis ah soo gaaray bishii December.
Matip ayaa 14 kulan u saftay tartamada oo dhan xilli ciyaareedkan ka hor inta uuna dhaawac soo gaadhin. Waxa uu ciyaaray seddex kulan oo ka tirsan Europa League.
Goolhaye Adrian, oo aan wax kulan ah ciyaarin xilli ciyaareedkan, ayaa booska Joel Matip lagu bedelay iyadoo Liverpool ay gudbisay liiskeeda ciyaartoyda u mataleysa tartanka.
Klopp ayaa liiska ciyaartoydiisa ku soo daray goolhaye kale, iyadoo Alisson uu haatan dhaawac muruqa ah ku maqan yahay.
Caoimhin Kelleher oo ah goolhayaha labaad ayaa tan iyo markii uu la wareegay booska Allison waxa uu noqday mid halis ah isagoo Liverpool u qaaday Carabao Cup oo ay ka badiyeen Chelsea.
Kelleher ayaa ku soo bilaaban doona goolka marka ay Liverpool wajahdo Sparta.
Be the first to comment