Khalkhalkii ay dhaawacyadu ku keeneen Newcastle United ayaa deggay, waxaanay kooxdaasi go’aansatay in aanay si habacsanaan ah u gelin suuqa iibka ciyaartoyda ee bishan January, taas oo ka dhigan in ay ka gaabin doonto xiddiga lala xidhiidhinayay ee Kalphin Phillips oo ay sidoo kale doonayaan Fulham iyo Crystal Palace. (i Sport)
Manchester United ayaa calaamadsatay afar ciyaartoy oo weerarka ah oo ay kala dooranayso bishan January, waxaanay kala yihiin Eric Maxim Choupo-Moting oo ah 34 jir u ciyaara Bayern Munich, Thomas Muller oo ah 34 jir isaguna Bayern Munich ah, Timo Werner oo RB Leipzig u dheela, iyo Serhou Guirassy oo ah 27 jir u dheela Stuttgart oo 16 ciyaarood oo uu u saftay u dhaliyey 19 gool xilli-ciyaareedkan. (Athletic)
Weeraryahanka England ee Ivan Toney oo 27 jir ah, ayaa rajaynaya in uu tegi doono Arsenal bisha January, laakiin dhibaatada ayaa ah in Gunners aanay doonayn inay bixiso £100 milyan oo Gini oo ay dalbanayso Brentford. (Football Transfers)
Garabka weerarka Manchester United ee Jadon Sancho oo 23 jir ah ayaa si weyn u doonaya inuu dib ugu laabto kooxdiisii hore ee Borussia Dortmund, si uu dib ugu helo kalsoonidiisii iyo qaab-ciyaareedkiisii. (Fabrizio Romano)
Tottenham lama filayo inaybishan January la saxeexato khadka dhexe ee Chelsea iyo England ee Conor Gallagher oo 23 jir ah, sababtoo ah Blues ayaa dalbanaysa £60 milyan oo Gini oo aanay Spurs diyaar u ahayn inay bixiso. (Football Transfers)
Everton waxa ay doonaysaa inay heshiis u bandhigto laacibkii hore ee Manchester United ee Jesse Lingard oo koox la’aan ahaa tan iyo xagaagii. 31 jirkan ayay Everton la saxeexan doontaa illaa dhamaadka xilli-ciyaareedkan socda. (Talksport)
Weeraryahanka Aston Villa iyo xulka Colombia ee Jhon Duran oo 20 jir ah, ayaa waxa doonaysa AC Milan, laakiin kooxda Talyaaniga ayaa waxa sidoo kale caqabad ku noqonaysa in aanu laacibkani haysanin dhalashada Midowga Yurub. (Sky Sports)
Trevoh Chalobah oo 24 jir u ciyaara Chelsea ayaa la filayaa in bishan January uu Blues kaga tago amaah. (Sun)
Sir Jim Ratcliffe iyo shirkaddiisa Ineos ayaa qorshaynaya in Dan Ashworth iyo Paul Mitchell ay u xil-saaraan waaxda iibka ciyaartoyda ee Manchester United. (I Sport)
Fulham ayaa doonaysa khadka dhexe ee Brazil ee Andre oo 22 jir ah, kaas oo lala xidhiidhinayo Liverpool, laakiin waxa Fulham caqabad ku ah qiimaha ay dalbanayso Fluminense oo ah £25 milyan oo Gini. (Football Transfers).
Be the first to comment