Kooxda kubadda cagta Manchester United ayaa dib u heshay dheemankeeda da’da yar ee khadka dhexe ee Kobbie Mainoo oo kasoo kacay dhaawac kasoo gaadhay ciyaartii Real Madrid ee ka dhacday waddanka Maraykanka ka hor intii aanay xilli-ciyaareedyadu bilaabmin.
18 jirkan oo kuraanta uu ka dhaawacmay markii ay isku dhaceen laacibka Real Madrid ee Rodrygo kulankii saaxiibtinimo ee waddanka Maraykanka, ayaa bandhig fiican ka sameeyey ciyaartii da’yarta FC Copenhagen ee xalay oo uu qaybtii hore ciyaaray.
Toddobaadkii hore, ayuu Erik ten Hag xaqiijiyey, in Kobbie Mainoo uu kasoo kabanayo dhaawaca oo uu bilaabay tababarka, haddana ay eegayaan xaaladdiisa ka hor inta aanay u badheedhin in kooxda koowaad ay keenaan.
Ten Hag ayaa la sheegay in uu ku qanacsan yahay Kobbie Mainoo oo uu doonayo inuu ka garab ciyaarsiiyo Casemiro ama Amrabat, waxaana la filayaa in uu kursiga kaydka kusoo bilaaban doono ciyaarta Manchester City ee Axadda.
Be the first to comment