Tababaraha kooxda kubadda cagta Real Madrid ee Carlo Ancelotti ayaa sii shaaciyey xeeladdiisa ciyaareed saacado badan ka hor ciyaarta finalka Champions League ee Borussia Dortmund oo caawa ay garoonka Wembley Stadium ee magaalada London.
Carlo Ancelotti ayaa saxaafadda la wadaagay ciyaartoyda uu kusoo bilaabayo qaarkood, halka Borussia Dortmund ay waqti dambe go’aamin doonto.
Tababaraha Talyaaniga oo lagu yaqaanno in uu laba saacadood ka hor shaaciyo shaxda kooxdiisa halka naadiyada kale ay shaaciyaan saacad ka hor waqtiga ciyaarta, ayaa waxa uu hadda soo kordhiyey inuu maalin ka hor sii sheego xiddigaha uu kusoo bilaabayo qaarkood.
Ruug-caddaagan oo markiisii shanaad caawa u dagaallamaya inuu ku guuleysto Champions League isaga oo tababare ah, sidoo kalena waqtigii uu ciyaartoyga ahaa hal mar kula soo guuleystay AC Milan, ayaa waxa uu sheegay in ciyaarta caawa uu kusoo bilaabi doono goolhayaha reer Belgium ee Thibaut Courtois oo muddo dheer dhaawac ku maqnaa, laakiin bishii ugu dambaysay si joogto ah u ciyaarayey.
Courtois ayaa waxay u noqon doontaa ciyaartii koowaad ee tartanka Champions League ee xilli-ciyaareedkan uu u safto Real Madrid, waxaana uu beddelayaa Andriy Lunin oo uu ku dhacay hargab uu u jiifay afartii maalmood ee ugu dambeeyey, taas oo keentay in xataa loo diido inuu ciyaartoyda kale kula safro diyaaraddii ay ku tageen magaalada London.
Be the first to comment