Halyeeyga Arsenal Lee Dixon ayaa shaxaray sababta Ben white uu muhiim ugu yahay Arsenal kulanka Premier League ee ay Axada la ciyaarayaan Manchester City.
White ayaa wacdarro u dhigay Arsenal todobaadyadii ugu danbeeyay, waxaana uu muhiim u noqday weerarka kooxda isagoo la qabsaday inuu ka dheelo garab midig xilli ciyaareedkan.
Gunners ayaa u safreysa Etihad Stadium iyagoo hal dhibic ka sareeya kooxda Pep Guardiola, waxaana horyaalka ka harsan kaliya 10 kulan.
Liverpool ayaa sidoo kale ku jirta tartanka horyaalka, laakiin Guardiola ayaa soo jeediyay inuu Arsenal u arko kooxda halista ku ah kooxdiisa.
Ka hor kulanka Arsenal iyo Man City ee Axada, daaficii hore ee Gunners Lee Dixon ayaa amaanay Ben White isagoo sheegay inuu fure u yahay guusha kooxda.
“Markii aan daawanayay Leeds iyo Brighton, waxaan ku fekeri jiray inuu mustaqbal fiican u leeyahay inuu weerarka caawiyo.” ayuu Dixon u sheegay Daily Mirror.
“Marka aad ka ciyaareyso daafaca gaar ahaan daafaca dhexe, ma ahan wax caadi ah inaad weerar iska aado. Waxay qaadaneysaa waqti inaad la qabsato boos xirashadaada marka ay kubada taalo goobaha qaar.
“Marka aad la ciyaareyso Man City, daafacyadaada garbaha waa muhiim, sababtoo ah waxay celinayaa xiddigaha garbaha ee weerarka.
“Waxay u baahan yihiin inay Man City cadaadis ku saaraan boosaska qaar si ay kubada ugu helaan meelo halis ah, daafacyada garbaha ayaana fure u ah.”
Be the first to comment