Waxa la shaaciyey waqtiga kulmada wareegga siddeedda tartanka FA Cup iyo baahintooda, waxaana musalsal noqotay ciyaarta adag ee Manchester United vs Liverpool oo laga dhigay maalin Axad ah iyo waqti aan hore loo dheeli jirin.
Xidhiidhka kubadda cagta FA ee maamula tartankan iyo telefishanka ITV oo iska leh xuquuqda baahinta ayaa isla qaatay in ciyaarta Manchester United vs Liverpool ee wareegga siddeedda FA Cup oo ah lug kaliya ay noqoto maalin Axad ah iyo saacad lama filaan ku noqotay jamaahiirta labada kooxood.
Ciyaartan ayaa bilaabmi doonta marka ay saacaddu tahay 3:30pm waqtiga UK, waxaana hal saac laga soo horreysiiyey xilligii la filayey in laga dhigayo ciyaartan.
Kulamada Premier League ee Axadda ayaa waxa caadiyan la dheelaa 2pm iyo 4:30pm waqtiga UK, laakiin waxa labada ciyaarood ee FA Cup ee la ciyaarayo maalintan mid walba laga soo horreysiiyey xilligii la filayey.
Ciyaarta hore waxay noqon doonaa Chelsea vs Leicester City oo la shaaciyey inay bilaabmi doono marka ay saacadda UK tahay 12:45pm oo ah xilli duhur ah oo aanay xataa reer UK qadaynin, halka ciyaarta kale ee adag ee Manchester United vs Liverpool ay iyaduna bilaabmi doono 3:30pm.
Si kastaba ha ahaatee, waxa kale oo muddooyinkan dambe uu isbeddel ku imanayey xilliyada looga bartay kulamada Axadda, waxaana ciyaarta Manchester Derby ee toddobaadkan ee Man City vs Man United ee Etihad Stadium ay bilaabmi doonaa 3:30pm halka la filayey inay noqoto 4:30pm waqtiga UK.
Be the first to comment