Manchester United waxaa maanta ka maqnaan kara shan xiddig oo kooxda koowaad ah kulanka horyaalka Premier League ee ay la balansan yihiin Aston Villa.
Erik ten Hag iyo kooxdiisa United ayaa u safraya Aston Villa maanta oo Axad ah.
Red Devils waxay haatan fadhiyaan kaalinta lixaad ee miiska kala sareynta horyaalka, iyadoo Aston Villa ay kaalinta shanaad ku jirto. Laakiin labada kooxood waxaa u dhaxeysa sideed dhibcood ka hor kulankooda maanta.
United ayaa seddexda dhibcood ka tirsatay Aston Villa kulankoodii ugu horeeyay ee xilli ciyaareedkan ee bishii December iyagoo guul soo laabasho 3-2 ah ka gaaray.
Kooxda Ten Hag waxay haatan gaareen seddex guul oo isku xigta tartamada oo dhan, laakiin waxaa ka maqnaanaya xiddig muhiim u ah kulanka maanta.
Lisandro Martinez oo dhawaan garoomada ku soo laabtay ayaa haatan maqnaan doona muddo labo bilood ah ka dib dhaawac jilibka ah oo soo gaaray kulankii ay 3-0 kaga badiyeen West Ham.
Daafaca kale Aaron Wan-Bissaka ayaa isna ay u badan tahay inuu seego kulankaan ka dib markii ay jug ku soo gaartay tababarka todobaadkan.
Waxaa iyagana muddo dheer maqan Mason Mount iyo Tyrell Malacia halka Anthony Martial loo qabtay inuu soo laabto bisha April ka dib markii uu maray qaliin gumaarka ah.
Be the first to comment