Shan Ciyaartoy Oo Lagaga Sheekaysto Qolka Labbiska Liverpool Oo Uu Doonayo Jurgen Klopp

Qolka labbiska Liverpool ayaa waxa lagaga sheekaysanayaa magacyada dhawr ciyaartoy oo uu tababare Jurgen Klopp isha ku hayo oo uu doonayo inuu keeno Anfield, si ay kooxdiisu mar kale u noqoto koox tartamaysa kaddib xilli ciyaareed adag oo ay kaalinta sagaalaad kaga jiraan miiska  kala-sarraynta

Suuqa  iibka ciyaartoyda oo xidhmaya January 31, ayay Liverpool isku dayaysaa inay la saxeexato ugu yaraan hal ciyaartoy oo khadka dhexe ah, balse waqtiga ayaa gabaabsi ku ah.

Reds ayaa waxay bishan January lasoo wareegtay Cody Gakpo oo ay £40 milyan oo Gini kaga soo iibsatay PSV Eindhoven, laakiin waxa muuqata in aanu xallin karaynin mushkiladda haysata kooxda illaa khadka dhexe ay iska tiiriyaan.

Thiago Alcantara, Jordan Henderson iyo Fabinho ayay ciyaartoodu hoos u dhacday, waxaanay taasi keentay in uu lumo qaab-ciyaareedkii lagu yaqaanay Liverpool halka Mohamed Salah uu illoobay sidii goolasha loo dhinayay usbuucyadii ugu dambeeyey.

Iyadoo dhibaatadani jirto, waxa qolka  labbiska Liverpool ka jira guux iyo hadal-haynta shan ciyaartoy oo ay taageereyaasha iyo ciyaartoyduba doonayaan in ay kooxdu la saxeexato, si ay u xalliyaan dhibaatada ku habsatay ee khadkaa dhexe.

Ciyaartoydan ayaa waxa ugu horreeya Jude Bellingham oo u ciyaara Borussia Dortmund oo ay kooxaha waaweyn ee Yurub ku tartamayaan saxeexiisa, Matheus Nunes oo ay Wolves xagaagii soo iibsatay, Moises Caicedo oo ka tirsan Brighton oo ay danaynayaan Chelsea iyo Arsenal, kaas oo xalay xaqiijiyey in diiraddiisu tahay inuu si fiican ugu ciyaaro Brighton.

Waxa kale oo qolka labbiska Liverpool lagaga sheekaysanayaa Sofyan Amrabat oo u ciyaara xulka qaranka Morocco iyo kooxda Fiorentina kaas oo qiimihiisa lagu sheegay £40 milyan oo Gini. Intan oo kaliya ma aha, waxa sidoo kale ku jira liiska ciyaartoydan xiddiga da’da yar ee reer Argentina ee Enzho Fernandez.

Be the first to comment

Leave a Reply

Your email address will not be published.


*