SADDEXDII Qalad Ee Uu Thomas Tuchel Sameeyey Kulankii Manchester City, Xiddigii Garoonka Iyo Qiimaynta Ciyaartoyda Labada Kooxood

Chelsea ayaa guul-darro xanuun badan kala soo kulantay Manchester City oo ay ugu tagtay Etihad Stadium, waxaana lagaga  soo badiyey 1-0 iyadoo ay hadda gabaabsi noqotay rajadoodii ahayd inay ku tartamaan horyaalka.

Man City ayay guushani siisay inay 13 dhibcood ku qabato hoggaanka horyaalka, hase yeeshee Liverpool ayay laba ciyaarood baaqi u yihiin oo haddii ay wada guuleysato soo gaaban karaysa farqiga dhibcaha  ee City ay ka horreyso.

Afartii qalad ee uu Thomas Tuchel sameeyey

1. Lukaku iyo Ziyech oo uu iska garab ciyaaray

Tababare Thomas Tuchel waxa uu qaladku sameeyey in uu iska garab ciyaarsiiyo Hakim Ziyech iyo Romelu Lukaku. Labada ciyaartoy ayaan marnaba muujin is-faham, waxaanay ahaayeen kuwo aan xataa isla socon oo uu midba dhinac u ordayo. Laacibka reer Morocco waxa uu ahaa mid aan haadba haysanin, waxaanay ahayd inuu waqti hore garoonka ka baxo.

Iyadoo ay kursiga kaydka ku jiraan Mason Mount, Timo Werner iyo Kai Havertz oo si walba uga saamayn badnaan lahaa ayaa uu Ziyech illaa waqti dambe kusoo gaadhay garoonka.

2. Khalkhal gudaha ah

Ciyaartoyda Chelsea ayaa khalkhalayay marka ay Manchester City kusoo qaaddo weerarka, waxaana difaaca laga dareemayay inay ka walaacsan yihiin cadaadiska kaga imanaya ciyaartoyda weerarka ee Manchester City.

Antonio Rudiger iyo Thiago Silva ayaa degganaa, haddii aanay iyagu joogi lahayna natiijada ciyaartu way ka beddelnaan lahayd sidan. Tirada goolasha ay badbaadiyeen iyo fursadaha ay joojiyeen ayaa badnaa, balse labada dhinac ee bidix iyo midg ayaa uu culays badani kaga imanayay, waxaana isku daadsanaa Malang Sarr, Cesar Azpilicueta iyo Marcos Alonso.

3. Lukaku oo la iska indho tirayay in kubadda lagu siiyo xerada ganaaxa

Thomas Tuchel ayay ahayd inuu ciyaartoydiisa ku cadaadiyo inay ku dedaalaan, in kubadda ay ku tuuraan xerada ganaaxa si ay Lukaku ugu geeyaan kubadda, laakiin taasi madhicin. Weeraryahanka reer Belgium ayaa halkii uu afka hore taagnaan lahaa waxa uu ku qasbanaaday inuu dib usoo noqdo oo uu kubbad-sameeye isku rogo.

Fursaddii ugu fiicnayd ee Chelsea ay heshay waxa abuuray Lukaku oo khadka  dhexe kubadda ka jiiday.

Xiddigii garoonka

Kevin de Bruyne oo goolka guusha u dhaliyey Manchester City ayaa bandhig fiican oo kalena ka sameeyey garoonka, waxaana  uu noqday ciyaartoygii ugu wanaagsanaa guud ahaan garoonka. Qiimayn darajadeedu tahay 9 ayuu helay De Bruyne, halka laacibka ugu soo xigay uu ka lahaa qiimayn darajadeedu 7 tahay.

Qiimayntii guud ee ciyaartoyda labada kooxood

Man City: Ederson (7), Walker (7), Laporte (7), Stones (6), Cancelo (7), Rodri (7), De Bruyne (9), Silva (7), Grealish (6), Foden (7), Sterling (7).

Beddelka: Gundogan (N/A), Gabriel Jesus (N/A)

Chelsea: Kepa (7), Rudiger (7), Silva (7), Sarr (6), Azpilicueta (6), Alonso (5), Kovacic (5), Kante (7), Pulisic (5), Ziyech (5), Lukaku (5).

Beddelka: Werner (6), Hudson-Odoi (6), Mount (N/A)

Be the first to comment

Leave a Reply

Your email address will not be published.


*