Real Madrid Oo Ka Dalbatay Karim Benzema, Modric Iyo Laba Ciyaartoy Oo Kale Inay Go’aan Ka Gaadhaan Mustaqbalkooda

Kooxda kubadda cagta Real Madrid ayaa lagu soo warramayaa inay xorriyad u siisay afara ka mid ah ciyaartoydeeda inay doortaan inay sii joogaan Santiago Bernabeu dhamaadka xilli ciyaareedkan iyo inay iska tagaan, iyadoo Florentino Perez uu go’aansaday in aanu wax cadaadis ah ku saarin in ay heshiisyo cusub saxeexaan.

Real Madrid ayay tiro ciyaartoydeeda ah xor noqon doonaan marka uu dhamaado xilli ciyaareedkan, balse ma doonayaan inay lumiyaan kuwa muhiim ah. Xiddigaha heshiisyadoodu dhamaadka yihiin ayaa waxa ka mid ah Marco Asensio, Nacho Fernandez, Dani Ceballos, Mariano Diaz, Toni Kroos, Luka Modric, Karim Benzema iyo Lucas Vazquez.

Sida uu qoray wargeyska Diario AS, Florentino Perez ayaa beddelay sidii uu ula macaamili jiray ciyaartoydiisa, gaar ahaan kuwa uu qaddarinta badan u hayo ee guulaha waaweyn soo gaadhsiiyey kooxda tobankii sannadood ee ugu dambeeyey.

Xiddiga reer France ee Karim Benzema iyo ruug-caddaaga khadka dhexe ee Luka Modric oo ah labada ciyaartoy ee ugu da’da weyn kooxda oo kala ah 35 jir iyo 37 jir ayay Real Madrid u deysay go’aanka ay gaadhayaan. Sidoo kale, Toni Kroos iyo Nacho Fernandez ayaa iyagana loo sheegay inay iskood go’aan u gaadhaan.

Karim Benzema oo 35 jir ah ayaa sannadihii ugu dambeeyey ahaa weeraryahanka kaliya ee ay Real Madrid haysato, isla markaana ku suntanaa guulihii xilli-ciyaareedkii tegay ee UEFA Champions League iyo LaLiga oo sabab u noqday in uu isaguna noqdo xiddiga sannadka ee hantiyey abaal-marinta Ballon d’Or.

Karim ayaa xilli ciyaareedkan ay lasoo darseen dhaawacyo, inkasta oo 18 kulan oo uu ciyaaray uu dhaliyey 12 gool iyo mid kale oo uu caawiye ka noqday.

Luka Modric oo isaguna tiir-dhaxaad shaqo badan ahaa, ayaa xilli ciyaareedkan u muuqda inuu lumiyey qaab ciyaareedkiisa, gaar ahaan intii ka dambaysay Koobkii Adduunka, waxaana uu labadii toddobaad ee ugu dambeeyey kusoo bilaabnayay kaydka.

Be the first to comment

Leave a Reply

Your email address will not be published.


*