Mykhailo Mudryk Oo Durba Jabiyey Rikoodhkii Horyaalka Premier League Ee Xilli-ciyaareedka

Saxeexa cusub ee Chelsea ee Mykhailo Mudryk ayaa durba jabiyey rikoodh u yaallay horyaalka waddanka Ingiriiska ee Premier League, kaddib 35 daqiiqadood oo kaliya oo uu ciyaaray kulankii Liverpool ee Sabtidii oo uu beddel kusoo galay, taas oo ahayd ciyaartiisii koowaad.

Mykhailo Mudryk ayaa muujiyey bandhig heersare ah iyo in aanu u baahnayn la-qabsi horyaalka Premier League ah, waxaana daqiiqadihii uu garoonka ku jiray uu ka farxiyey tababare Graham Potter iyo Todd Boehly oo £89  milyan oo Gini kasoo bixiyey.

Daqiiqaddii 55aad ayuu Graham Potter sameeyey beddel, waxaana uu soo geliyey Mykhailo Mudryk oo dhibaato badan ku abuuray ciyaartoyda Liverpool ee garoonkooda Anfield ku ciyaarayay, waxaanay taageereyaasha Chelsea markiiba bilaabeen inaya ku tilmaamaan Eden Hazard-ka cusub.

Inkasta oo uu 35 daqiiqadood ciyaaray, haddana waxa uu Mykhailo Mudryk oo 22 jir ah uu rikoodh cusub ka sameeyey horyaalka Premier League xilli ciyaareedkan, isaga oo orday 36.63 km saacaddii, waana xawaarihii ugu dheeraa ee horyaalka Premier League uu ciyaartoy ka sameeyo xilli ciyaareedkan.

Waxa uu jabiyey rikoodhkan ciyaartoyda xawaaraha ugu dheereeya ee orodka sameeyey xilli ciyaareedkan oo ah ahaa weeraryahanka Everton ee Anthony Gordon oo 36.1km/h orday, halka uu weeraryahanka Liverpool ee Darwin Nunez uu u dhacay saddexaad isaga oo xawaaraha orodka loo diiwaangeliyey uu yahay 36.53km/h.

Erling Haaland iyo Denis Zakaria ayaa isku xiga oo jaray xawaare orod oo ah 36.22 km/h iyo 36.09 km/h sida ay magacyadoodu u kala horreeyaan.

Mudryk ayaa rajaynaya inuu ciyaartiisa koowaad ee Premier League ah kusoo bilaaban doono kulanka Fulham ee February 3.

Be the first to comment

Leave a Reply

Your email address will not be published.


*