Manchester City Oo Joao Cancelo U Isticmaalaysa Saxeexa Xiddiga Portugal Ee Ay Kooxaha Yurub Ku Dagaallamayaan

Tababaraha Manchester City ee Pep Guardiola ayaa waxa uu diyaar u yahay in uu kooxdiisa ka diro difaaca boosaska badan ka ciyaara ee Joao Cancelo oo uu doonayo inuu kusoo beddesho ciyaartoy kale, xilli uu laacibkani kursiga kaydka fadhiyey kulamadii ugu dambeeyey.

Cancelo oo Manchester City ay sannadkii 2019 kala soo wareegtay Juventus, ayaa qayb weyn kasoo qaatay guulihii ay kooxdu gaadhaysay sannadihii ugu dakmbeeyey, waxaana 154 ciyaarood oo uu u saftay uu u dhaliyey sagaal gool iyo 22 kale oo uu caawiye ka noqday.

Xilli-ciyaareedkana socda ayuu saftay 17 ciyaarood oo uu laba gool dhaliyey, mid kalena caawiyey, waxaase kulamadii ugu dambeeyey uu GFuardiola ka doorbiday laacibka da’da yar ee Rico Lewis oo booska kala baxay.

Sida uu qoray wargeyska Calcio Mercato ee kasoo baxa waddanka Talyaaniga, tababare Pep Guardiola ayaa doonaya inuu Joao Cancelo iyo lacag iskugu daro AC Milan si uu ugala soo wareego garabka weerarka Portugal ee Rafael Leao.

Xiddigan reer Portugal oo 18kii bilood ee ugu dambeeyey muujinayay inuu yahay ciyaartoyga ugu wanaagsan horyaalka Talyaaniga ee Serie A, isla markaana xilli-ciyaareedkii tegay ee 2021-22 dhaliyey 19 gool 16 kalena caawiyey ayaa soo jiitay indhaha kooxo badan, waxaana hadda si dardar ah kusoo gashay doonistiisa Manchester City.

23 jirkan oo qandaraaskiisa AC Milan ay ka hadhsan yihiin 18 bilood, ayaa waxa Guardiola oo adeegsanaya lacag iyo Cancelo uu doonayaa inuu ku qanciyo Milan inay iibiso laacibkan oo uu hore Paulo Maldini u caddeeyey inuu qorshahoodu yahay inay heshiis cusub ka saxeexaan.

Si kastaba ha ahaatee, AC Milan ayaan la ogeyn inay ogolaan doonto dalabka Manchester City ee lacagta iyo Cancelo ee wada socd ah.

Be the first to comment

Leave a Reply

Your email address will not be published.


*