Liverpool Oo Ku Rogaal-celisay Xiddigii Juventus Ee Hore Iskaga Diiday & Mohamed Salah Oo Ka Tegaya Anfield

Kooxda kubadda cagta Liverpool ayaa doonaysa inay la saxeexato ciyaartoy hore iskaga diiday inuu yimaaddo Anfield oo ku sugan Juventus, kaas oo ay Reds u aragto inuu yahay ciyaartoyga ugu habboon ee u beddelaya Mohamed Salah oo shaki la gelinayo mustaqbalkiisa inkasta oo uu dhowaan saxeexay heshiis cusub.

Jurgen Klopp ayaa rajaynaya in kooxdiisa lagu sameeyo dibu-dhis weyn suuqa iibka ciyaartoyda ee xagaaga, si ay mar kale u noqon karaan koox ku tartami karta horyaalka Premier League.

Liverpool oo kaalinta sagaalaad kaga jirta miiska kala-sarraynta Premier League, isla markaana 21 dhibcood ka dambaysa Arsenal oo hoggaanka hays, ayaa quus ka taagan xilli ciyaareedkan, waxaana xataa sii lumaysa fursadda ay kusoo gaadhi karayaan kaalinta afraad.

Inkasta oo lala xidhiidhinayo ciyaartoyda khadka dhexe ee Jude Bellingham iyo Enzo Fernandez, haddana wxa la sheegay in Liverpool ay u dhaqaaqayso saxeexa xiddiga Juventus iyo xulka Talyaaniga ee Federico Chiesa oo la rumaysan yahay in helistiisu ay u fududdahay Jurgen Klopp marka laga eego dhinaca lacagta iyo in ciyaartoyda waaweyn ay waqtigan ka cararayaan Old Lady kaddib fadeexadda sababtay in 15 dhibcood laga jaro toddobaadkii hore.

Chiessa oo sannadkii 2020 iska diiday Liverpool oo si aad ah u doonaysay kaddib wacdarihii uu ka dhigay garoomada, ayaa sida uu qoray wargeyska Calcio Mercato waxay Liverpool diyaarisay dalab £53 milyan oo Gini ah oo ka gudbinayso 25 jirkan oo kasoo kabanaya dhaawac uu muddo dheer u jiifay.

Lacagta ayaa la sheegay in ay gaadhi karto illaa £60 milyan oo Gini, waxaana si fudud ku aqbali doonta Juventus oo baahi lacageed ay hayso, sida uu wargeysku qoray.

Dhinaca kale, Caliomercato ayaa xusay in Liverpool ay suurtogal tahay inuu ka tago xiddiga Masar ee Mohamed Salah oo lala xidhiidhinayo PSG oo ku doonaysa £70 milyan oo Gini.

Salah oo xilli ciyaareedkan ku dhibaatoonaya garoomada, qaybna ka ah hoos u dhaca ku yimid kooxdiisa ayaa uu warku sheegay in aanu sugnayn mustaqbalkiisa Anfield, sidaas darteedna uu Jurgen Klopp sii diyaarsanayo beddelkiisa.

Be the first to comment

Leave a Reply

Your email address will not be published.


*