Karim Benzema Oo Ku Sugan Jasiiradda La Qariyey Ee Duleedka Afrika Ee Dalkiisu Haysto

Karim Benzema ayaa ku sugan meel aad loo qoriyey sirteeda iyo safarkiisa oo ku taal duleedka Afrika, kaddib markii ay burburtay riyadiisii Koobka Adduunka ee uu soo gaadhay dhaawacu isaga oo ku sugan waddanka  Qatar.

Tababare Didier Deschamps ayaa go’aansaday in aanu u yeedhin ciyaartoy beddela Benzema, waxaanay taasi ka dhigan tahay in laacibkani uu fursad u haysto inuu ciyaaro kulamada Koobka Adduunka ee wareegyada dambe haddii uu taam u noqdo oo uu kasoo bogsado dhaawaca.

Maalmihii ugu dambeeyey ayaa wararka laga helayay Spain waxay sheegayeen in Benzema uu si degdeg ah uga soo kabanayo dhaawaca oo uu kasoo horreynayo waqtigii la filayay inuu kusoo laabanayo garoomada, taas oo haddii ay dhacdo fursad u siin karaysa inuu kusoo laaban karo Koobka Adduunka.

Arrintan ayaase hadda u muuqata in aanay macquul ahayn sababtoo ah Karim Benzema ayaa ka degay goob sir  ah toddobaadkan horraantiisii, waxaana uu ku qaadanayaa usbuuc fasax ah.

Wargeyska L’Equipe ee kasoo baxa Faransiiska ayaa daabacay sawir muujinaya Benzema oo ku sugan jasiiradda ku taalla badweynta India ee La Reunion oo ku taalla duleedka waddanka Madagascar ee ka tirsan qaaraddan Afrika, waxaanay arrintaasi meesha ka saaraysaa inuu toddobaadkan tababarka la bilaabo ciyaartoyda kooxdiisa Real Madrid.

Benzema ayaa markii hore la filayay inuu tababarka la bilaabo kooxdiisa dhamaadka usbuucan, balse fasaxa uu ku tegay La Reunion ayaa waxay keenaysaa inuu dib u dhaco oo sidoo kale ay meesha ka baxdo fursaddii uu dib ugu laaban lahaa Koobka Adduunka.

Saxaafadda Spain ayaa sheegaysa in arrintani ay muujinayso in Benzema ay waqti dheer ku qaadan doonto inuu taam ka noqdo dhaawacyada ragaadiyey xilli ciyaareedkan, sidoo kalena aanu u dhoweyn inuu tababarka kusoo laabto.

Si kastaba ha ahaatee, haddii uu Karim Benzema kasoo noqdo dhaawaca ka hor dhamaadka koobka adduunka, waxa suurtogal ah in Didier Deschamps uu u yeedho kulamada ugu dambeeya Koobka Adduunka haddii ay soo gaadhaan, inkasta oo la sheegayo in  Deschamps aanu doonayn inuu laacibkan u yeedho maadaama uu hore dhaawac ugaga baxay xulka.

Be the first to comment

Leave a Reply

Your email address will not be published.


*