Gary Neville Oo Qiimeeyey Fursadda Uu Xulka Qaranka Brazil Ugu Guuleysan Karayo Koobka Adduunka

Halyeyga reer England ee Gary Neville ayaa qiimayn ku sameeyey fursadda xulka qaranka Brazil u haysto ku guuleysiga Koobka Adduunka ee ka socda waddanka Qatar, kaddib markii uu daawaday ciyartii ay Isniintii 1-0 ku garaaceen Switzerland ee ay ugu gudbeen wareegga 16ka.

Brazil oo uu dhaawac kaga maqan yahay Neymar oo la filayo in sidoo kale uu seego ciyaarta ugu dambaysa hormadooda, isla markaana la dhibaatoonaya dhaawac kuraanta ah oo kasoo gaadhay kulankii Serbia ee Khamiistii, ayaa waxa xalay la baxsaday xiddiga khadka dhexe ee Manchester United ee Casemiro oo gool qurux badan u dhaliyey.

Fransiiska, Portugal iyo Brazil ayaa u gudbay wareegga 16ka, balse dalal kale oo waaweyn oo kulamadoodii hore natiijooyin fiican keenay ayaa la filayaa inay soo raacaan caawa, iyadoo laba group ay kala bixi doonaan oo afar dal la xaqiijin doono inay iyaguna soo gudbeen.

Neville oo xalay ka hadlayay istuudiyaha telefishanka ITV markii ay dhamaatay ciyaartii ay Brazil ku garaacday Switzerland, ayaa la weydiiyey haddii xulka qaranka tababare Tite uu ku guuleysan karayo Koobka Adduunka, waxaanu ku jawaabay: “Way ku guuleysan karaan.

“Waxa aan u malaynayay in ciyaarta ugu wanaagsan Koobka Adduunku ay ahayd kulankii Spain vs Germany, laakiin Brazil ayay ila tahay inay heerkooda tahay oo ay waliba kasii sarrayn doono.

“Sidooda oo kale uma ciyaar wanaagsan, balse waxay taagan yihiin meel wanaagsan. Waxay muujiyeen inay is-difaaci karaan, maanta [xalay] xataa hal mar goolkooda lama tooganin. Waxa kale oo aya muujiyeen inay ciyaaraha beddeli karayaan oo ay kusoo kordhin karayaan ciyaartooyo tayo leh oo firfircoon oo kaydka fadhiya.

“Waxay ila tahay inay meel wanaagsan joogaan.”

Brazil ayaa ciyaarteeda ugu dambaysa waxay Jimcaha la ciyaari doontaa Cameroon oo iyadunaa u dagaallamaysa inay soo gudubto, kaddib markii ay barbarro 3-3 ah la gashay Serbia Isniintii.