Frank Lampard Oo La Ogaaday Lacagta Malaayiinta Ah Ee Uu Magdhowga Uga Qaadanayo Everton

Kooxda kubadda cagta Everton ayaa shalay shaqada ka caydhisay tababaraheedii Frank Lampard oo muddo sannad ah xilka hayay, isaga oo bishii January ee sannadkii hore xilka ka dhaxday Rafa Benitez.

Lampard ayaa raacay raadka tababareyaal toddoba ahaa oo ay Everton shaqada ka eriday intii uu Moshiri guddoomiyaha ka ahaa oo kasoo bilaabmaysa sannadkii 2016. Waxa ugu horreeyey Roberto Martinez oo ay kusii xigeen Ronald Koeman, Marcelo Silva, Sam Allardyce, Carlo Ancelotti [Isaga ayaa iskaga tegay oo u wareegay Real Madrid], Rafa Benitez iyo ugu dambayntii oo Lampard ah.

Dhamaan tababareyaashan ayaa markii ay Everton shaqada ka eriday waxay siisay lacago magdhow ah oo ah mushaharka sannadihii ugu hadhsanaa heshiisyadooda, balse Carlo Ancelotti ayay ka heleen lacag gaadhaysa £5 milyan oo Gini oo ay siisay Real Madrid markii uu xagaagii sannadkii hore iskaga tegay isaga oo aan dhamaysanin heshiiskiisa.

Everton oo saddexdii sannadood ee ugu dambeeyey diiwaangelinaysay khasaare lacageed oo wadartiisu tahay £372 milyan oo Gini, ayaa waxay hadda diyaarinaysaa magdhow ay siiso Frank Lampard oo ay 18 bilood ka hadhsanaayeen heshiiskii uu u saxeexay bishii January ee sannadkii hore ee 2022.

Lampard ayaa la rumaysan yahay in uu toddobaadkii qaadan jiray £75,000 Gini, laakiin uu mar dambe hoos u dhigay oo uu aqbalay in toddobaadkii la siiyo £65,000 Gini, waxaana uu hadda ka doonaya in ay Everton xisaabtiisa bangiga ku shubto mushaharkii uu qaadan lahaa 18ka bilood ee ka  hadhsan heshiiskiisa.

Wargeyska Liverpool Echo ee kasoo baxa magaalada ay Everton ka dhisan tahay ayaa waxa uu sheegay, in Everton ay magdhow u siin doonto Lampard lacag gaadhaysa £4.7 milyan oo Gini.

Dhinaca kale, Everton ayaa raadinaysa tababare cusub oo u beddela Lampard, waxaana  lala xidhiidhinayaa Marcelino oo laylin jiray Athletic Bilbao, Nuno Espirito Santo oo Wolves iyo Tottenham soo layliyey iyo tababareyaal kale oo qaarkood kooxo kale joogaan waqtigan.

Be the first to comment

Leave a Reply

Your email address will not be published.


*