DEG-DEG: Arsenal Oo Si Rasmi Ah U Shaacisay Saxeexii La Sugayay

Kooxda kubadda cagta Arsenal ayaa si rasmi ah ugu dhawaaqday heshiiska daafaca reer Poland ee Jakub Kiwior oo maalin ka hor ka gudbay tijaabada caafimaadka, isla markaana ku sugnaa Emirates ciyaartii Axaddii ay Gunners 3-2 ku garaacday Manchester United.

Arsenal ayaa waxay ka bixisay laacibkan €25 milyan oo Euro oo ay u shubayso kooxda horyaalka Talyaaniga ee Spezia, waxaana uu saxeexay heshiis shan sannadood ah oo soconaya illaa sannadka 2027, kaas oo uu la socdo sannad kale oo dookh ah oo Gunners siinaya inay kordhin karto qandaraaska laacibkan.

Arsenal ayaa si rasmi ah laacibkan ugu soo bandhigtay garoonkeeda, waxaana saxaafadda la hadlay Edu iyo Mikel Arteta oo amaan kula dul-dhacay Jakub Kiwior.

Edu oo ka hadlayay laacibkan ayaa yidhi: “Aad ayaanu ugu faraxsanahay in aanu dhamaystirno heshiiska Jakub Kiwior. Waa ciyaartoy da’yar oo aanu in muddo ah la soconay. Waxa aanu rajaynaynaa in aynu arki doono Jakub oo sii wadaya horumarka, waananu kusoo dhoweynaynaa Arsenal.”

Tababare Mikel Arteta ayaa isaguna yidhi: “Waa wax wanaagsan in Jakub uu ngu soo biiro. Waa difaac da’yar oo boosas kala duwan ka ciyaara, waxaana uu tayadiisa ku muujiyey intii uu u ciyaarayay Spezia horyaalka Talyaaniga iyo xulka qaranka Poland.”

Arsenal ayaa waxay lacagta Jakub Kiwior u kala bixin doontaa laba qaybood, waxaana la filayaa inuu kulankiisa koowaad u safan doono ciyaarta Jimcaha ee wareegga siddeedda FA Cup, waxaana uu laacibkan lugta bidix ku dheela uu difaaca dhexe kula tartami doonaa Gabriel Magalhaes iyo William Saliba.

Be the first to comment

Leave a Reply

Your email address will not be published.


*