Christian Eriksen Oo Magacaabay Labada Halyey Ee Uu Kaga Daydo Ciyaarista Kubadda Cagta Iyo Farsamadeeda

Xiddiga khadka dhexe uga ciyaara Manchester United iyo xulka qaranka Denmark ee Christian Eirksen ayaa magacaabay labada ciyaartoy ee uu kaga dayan jiray ciyaarista kubadda cagta markii ay da’diisu yarayd, waana laba ruug-caddaa oo ka fadhiistay cagta.

Eirksen ayaa waxa uu sheegay, in markii uu carruurta ahaa ee uu bilaabay kubadda cagta uu ku dayan jiray halyeeyadii Talyaaniga iyo Denmark ee Francesco Tottei iyo Michael Laudrup, balse aanu nasiib u yeelanin inuu midkoodna ka  garab ciyaaro.

Totti oo lagu tilmaamo ciyaartoygii ugu wanaagsanaa ee soo maray taariikhda kooxda Roma oo uu ku qaatay muddo 28 sannadood ah, ayaa ka  caawiyey inay ku guuleystaan shan koob oo uu ku jiro horyaalka Serie A oo xilli ciyaareedkii 2000-01 ay ku guuleysteen. Muddadii uu joogay caasimadda  Talyaaniga  ayaa waxa uu Tottei u dhaliyey Roma in ka badan 250 gool, waxaana uu sidoo kale sannadkii 2006 ka mid ahaa xiddigihii Talyaaniga u qaaday Koobka Adduunka.

Laudrup ayaa isaguna laba jeer ku guuleystay ciyaartoyga sannadka ee waddanka Denmark, waxaana uu ku guuleystay 15 koob intii uu garoomada ku jiray, isaga oo u ciyaaray kooxaha Barcelona, Real Madrid, Juventus iyo Ajax. Denmark ayuu ka caawiyey inay yimaaddaan wareegga siddeedda Koobkii Adduunka 1998kii.

Christian Eriksen oo ka jawaabayay su’aalo laga weydiiyey telefishanka kooxdiisa Manchester United ee MUTV ayaa mar la su’aalay ciyaartoydii uu ku dayan jiray markii uu yaraa, waxa uu yidhi: “Waxa jiray laba ciyaartoy oo aan ku dayan jiray. Midkood wuxuu ahaa Totti oo aan ku dheelay ciyaar-gacmeedka ‘Football Manager’ iyo Laudrup. Michael Laudrup ayaa ahaa midka aan aadk u taageeri jiray, sababtoo ah waxa uu ahaa Danish, qaab-ciyaareedkiisana waan jeclaa.”

Be the first to comment

Leave a Reply

Your email address will not be published.


*