Spain & Germany Oo Isku Garab Dhacay, Rajada Jarmalka Oo Xun & Group E Oo La Isku Dhegan Yahay

Xulka Spain iyo Germany ayaa barbaro 1-1 ah ku kala baxay kulankoodii caawa taasoo sii adkeysay xaalada Group E oo dhamaan afarta kooxood ay weli rajo ka leeyihiin inay u soo baxaan wareega 16ka.

Gool uu dhaliyay Alvaro Morata ayay Spain hogaanka ku qabatay ka hor inta uusan Fallkrug u barbareynin dhamaadkii ciyaarta.

Natiijadaana ayaa ka dhigan in Spain ay 4 dhibcood ku hogaamineyso Group E halka ay ku soo xigaan Japan iyo Costa Rica oo min seddex dhibcood leh iyadoo Germany ay leedahay hal dhibic.

Rajada xulka Jarmalka ayaa ku xiran inay Costa Rica ka badiyaan islamarkaana Spain ay ka badiso ama barbaro la gasho Japan

Ciyaarta qeybteedii hore ayaa xiiso laheyd iyadoo labada xul ay ciyaareen kubad weerar iyo weerar celis ah oo aan lagu caajisin.

Spain ayaa u dhawaatay inay hogaanka qabato markii Dani Olmo uu kubad gantaal aheyd birta ku garaacay, halka Ferrn Torres uu dusha sarre mariyay kubad u baahneyd inuu shabaqa si aayar ah ugu taabto.

Dhamaadkii qeybta hore ay Jarmalka moodeen inay hogaanka u qabteen ciyaarta markii Rudiger uu kubad laad xor aheyd madax ku dhaliyay.

Laakiin goolkaas waa la diiday madaama daafaca Real Madrid Rudiger uu offside ahaa, waxaana qeybtii hore lagu kala nastay barbaro goolal la’aan ah.

Qeybtii labaad ee ciyaarta tababare Luis Enrique ayaa bedel muhiim ah sameeyay ka dib markii uu bixiyay Ferran Torres isagoo ka soo geliyay Alvaro Morata daqiiqadii 53aad.

Bedelkaas ayayna Spain ku faa’iday daqiiqadii 62aad markii Alvaro Morata uu kubad shabaqa ku shubay ka dib baas uu ka helay Jordi Alba.

Daqiiqadii 73aad Jarmalka waxaa soo martay fursad ay ciyaarta ku barbareyn kareen markii Musaila uu kubad ku helay goolka hortiisa laakiin waxaa si fantastik ah u soo badbaadiyay goolhaye Simon.

Jarmalka ayaa ugu danbeyn helay goolkii barbaraha ay baadigoobayeen ka dib markii Sane uu kubad u dhigay Musaila kaasoo isna kubada uga leexday Fullkrug oo shabaqa meel kore ka toogtay ciyaartana ka dhigay barbaro 1-1 ah.

Dhamaadkii ciyaarta fursad dahabi ah ayaa waxaa Jarmalka ka qasaariyay Leroy Sane, waxayna ciyaarta ku dhamaatay barbaro 1-1 ah.

Be the first to comment

Leave a Reply

Your email address will not be published.


*