Maxaa Sababay In Morocco Ay Bedesho Goolhayihii Ay Ku Soo Bilowday Shaxda Ka Hor Inta Aan Ciyaarta La Bilaabin?

Goolhaye Yassine Bounou uma ciyaarin xulka Morocco kulankii ay ka badiyeen maanta Belgium inkastoo shaxda lagu soo bilaabay islamarkaana uu ka qeyb galay safka lagu qaadayay heesta calanka wadankiisa.

Laakiin waxaa durbadiiba garoonka laga waayay waqtigii ay ciyaartoyda iska qaadayeen sawirka ka hor inta aysan bilaabanin ciyaarta iyadoo goolhayaha Sevilla uu muuqbeelay.

Waxaa booskiisa bedelay goolhayaha labaad Munir Mohand Mohamedi, iyadoo dad badan ay la yaabeen bedelka ay Morocco ay sameysay ilbiriqsi ka hor inta aan la baasin kubadii ugu horeysay ee ciyaarta.

Tabiyayaasha ciyaarta ee BBC ayay ku qaadatay ilaa daqiiqadii 38aad inay ogaadaan in goolhaye Yassine Bounou inuusan ciyaareynin, iyagoo dhowr jeer Mohamedi ugu yeeray magaca goolhayaha Sevilla oo Bono lagu naaneeso.

Waa wax caadi ah in la arko in ciyaartoy ka baxaan shaxda kooxda waqtiga iskululeynta laakiin waxaa qariib ah in la arko ciyaaryahan maray iskululeynta islamarkaana safka soo galay ka hor inta aan la bedelin.

Hadaba maxaa sababay?

Waxaa la isku raacay in goolhayaha uu xanuunsanaa ka hor ciyaarta islamarkaana uu daqiiqadii ugu danbeysay uu go’aansaday inuusan taam u aheyn inuu ciyaaro.

BBC ayaa sheegtay in goolhaye Bono uu ka cabanayay aragtidiisa isha ka hor ciyaarta halka jariirada Faransiiska ee L’Equipe ay sheegtay in Bono uu dareemay wareer, taasoo keentay inuu ka baxo kooxda.

Be the first to comment

Leave a Reply

Your email address will not be published.


*