Kabtanka kooxda kubadda cagta Newcastle United ee Jamaal Lascelles ayaa shuruud waalli ah ku xidhay in uu garankiisa u beddelo weeraryahanka reer France ee Kylian Mbappe kulanka Champions League ee ay kooxahooda PSG iyo Newcastle United ku ballansan yihiin.
Newcastle ayaa garoonkeeda St James’ Park kusoo dhoweyn doonta PSG, waxaanay u halgami doonaan inay hoggaanka u qabtaan groupka oo ay guul ka gaadhaan kooxda reer France kaddib markii ay ciyaartii hore barbarro 1-1 ah garoonka San Siro kula soo galeen AC Milan.
Jamaal Lascelles ayaa waxa uu sheegay in kooxdiisu ay halgan u geli doonto sidii ay u xaqiijisan lahayd in ay guushii koowaad ee Champions League ah diiwaangeliso muddo 20 sannadood ka badan marka ay garoonka St James’ Park kusoo dhoweeyaan PSG.
Kooxda reer France oo xagaagii ay ka tageen Lionel Messi iyo Neymar, ayaa hoggaamiyeyaasheedu ay noqdeen Kylian Mbappe, Ousmane Dembele, Gini Donnarumma iyo Achraf Hakimi, waxaase uu Jamaal Lascelles uu sheegay in aanu garankiisa u beddeli doonin Mbappe kaliya haddii uu isagu weydiisto, iyo marka ay garoonka ka baxaan ee ay tuunalka galaan oo kaliya.
“Run ahaantii ma aha arrin aanu ka wada hadalnay. Waxa kaliya aanu diiradda saaraynaa sidi aanu u xaqiijin lahayn in aanu maamulno ciyaartoydayada. Waxa aanu doonaynaa in aanu ku dhegsanaano qorshahayaga ciyaareed iyo in aanu guuleysano.” Ayuu yidhi Jamaal Lascelles.
Waxa uu intaa ku daray: “Waxa aanu isku dayi doonaa in aanaan dan ka gelin magacyada naga hor imanaya. Haddii uu Mbappe i weydiisto garankayga, waxa aan kaliya u beddeli doonaa marka aanu garoonka ka baxno ee aanu dhamaysano shaqada garoonka.”
Be the first to comment