Tababaraha kooxda kubadda cagta Arsenal ee Mikel Arteta ayaa ka hadlay dhaawaca Bukayo Saka oo ay waxyeello kasoo gaadhay ciyaartii ay xalay 2-0 ku garaaceen Sevilla.
Xiddiga reer England oo dhaliyey gool qurux badan, sidoo kalena caawiyey goolka uu Leandro Trossard ku furay ciyaarta qaybta hore, ayaa waxa soo gaadhay dhaawac.
Laacibka reer England ayaa dhawr daqiiqadood dhulka jiifay, waxaana garoonka ugu soo galay dhakhaatiirta oo u sameeyey daawooyinka, iyadoo dhawr daqiiqadood kaddibna lagu beddelay Jakub Kiwior.
Mikel Arteta oo saxaafadda la hadlay ayaa waxa uu faahfaahin ka bixiyey dhaawaca Bukayo Saka oo walaac ku abuuray taageereyaasha, maadaama ay hore dhaawacyo ugu jiifeen Gabriel Jesus, Eddie Nktiah iyo Thomas Partey.
“Waxa ku dhacay laad, waxaanay dhakhaatiirtu ii sheegeen, in aanu ku faraxsanayn in uu sii wato ciyaarta.” Ayuu yidhi Mikel Arteta, waxaanu ku daray: “Waxa uu dareemayay in aanu taam ahayn, laakiin waxa aan rajaynayaa in uu diyaar u noqon doono ciyaarta soo socota.”
Be the first to comment