Horyaalka waddanka Ingiriiska ee Premier League ayaa toddobaadkan waji kale yeeshay, waxaana kuftay Arsenal oo kasoo degtay figta sare oo ay la wareegtay Manchester City oo sannadkii afraad oo xidhiidh ah raadinaysa in ay ku guuleysato horyaalka Premier League.
Inkasta oo ay Tottenham isku ballaadhin doonto horyaalka haddii ay guuleysato Isniinta, haddana Manchester City oo kaalinta koowaad soo gashay kulanka sagaalaad ee horyaalka ayaa ah wax aan la dhayalsan karaynin, waxaana durba ay su’aalo ka taagan yihiin naadiyada tirada yar ee awoodi karaya inay dhibco ka jaraan kooxda tababare Pep Guardiola.
Arsenal ayaa laba dhibcood ku lumisay safar ay ugu tagtay naadiga ay isku magaalada yihiin ee Chelsea oo ay barbarro waqti dambe ah ka toogtay, waxaana hadda farqiga goolasha ay kaga dambeeyaan Man City oo ahayd kooxdii ugu dambaysay ee ay garaaceen.
Liverpool ayaa iyaduna kusoo laabatay jidka guusha oo hal dhibic ka dambaysa Man City iyo Arsenal, waxaana aynu halkan ku eegaynaa isbarbar-dhigga kulamada shanta ah ee kusoo waajahan afarta kooxood ee hoggaanka u haya horyaalka Premier League.
Manchester City nasiib ayay leedahay haddii ay guulo gaadho shanta kulan ee kusoo socda ee horyaalka, waxaana caddaan doonta in aanay cidina qaban karaynin haddii ay 15kaas dhibcood meel dhigato, naadiyada kalena waxay ku qasbanaan doonaan in ay aqbalaan in sannadkii afraad oo xidhiidh ah uu Guardiola ku guuleysanayo horyaalka.
Sababta go’aankan loo qaadanayo waa in ay Citizens waajahayso afar kooxood oo waaweyn shanta kulan ee soo socda, waxaana Axadda soo socota ay foodda is-dari doonaan Manchester United oo ay waliba ku booqan doonto Old Trafford, ka hor inta aanay ku nasanin Bournemouth.
Pep Guardiola ayaa waxa kaddib ay kooxdiisu u tegi doontaa Chelsea inta aan la gelin fasaxa kulamada caalamiga ah ee bisha November, waxaana marka laga soo laabto ay waajihi doonaan Liverpool iyadoo ay ciyaartoydoodu dallan yihiin, haddana waxa ay iska hor iman doonaan Tottenham.
Saddexda kooxood ee kale waxa sugayo kulamo fudud marka loo eego Man City, tusaale ahaan kooxda ugu weyn ee ay Arsenal la ciyaari doonto waa Newcastle, halka Liverpool iyo Tottenham ay kulamadooda ugu adag yihiin Man City.
Waa kuwan min shanta ciyaarood ee kusoo foolka leh afarta kooxood ee ugu sarreeya Premier League
Shanta ciyaarood ee Manchester City
Manchester United (Marti) – Axad, October 29
AFC Bournemouth (Minan) – Sabti, November 4
Chelsea (Marti) – Axad, November 12
Liverpool (Minan) – Sabti, November 25
Tottenham (Minan) – Axad, December 3
Shanta ciyaarood ee Arsenal
Sheffield United (Minan) – October 28
Newcastle (Marti) – November 4
Burnley (Minan) – November 11
Brentford (Marti) – November 25
Wolves (Minan) – December 2
Shanta ciyaarood ee Tottenham
Fulham (Minan) – Isniin, October 23
Crystal Palace (Marti) – Friday, October 27
Chelsea (Minan) – Isniin, November 6
Wolves (Marti) – Sabti, November 11
Aston Villa (Minan) – Axad, November 26
Shanta ciyaarood ee Liverpool
Nottingham Forest (Minan) – Axad, October 29
Luton Town (Marti) – Axad, November 5
Brentford (Minan) – Axad, November 12
Man City (Marti) – Sabti, November 25
Fulham (Minan) – Axad, December 3
Be the first to comment