Kooxda kubadda cagta Liverpool ayaa isticmaali doonta hub qarsoon oo ay u adeegsan doonto sidii ay ula saxeexan lahayd xiddiga Bayern Munich ee Jamal Musiala oo ay ka go’an tahay Jurgen Klopp in uu keeno garoonka Anfield.
Liverpool ayaa maalmihii ugu dambeeyey lala xidhiidhinayay Leroy Sane si uu ugu noqdo beddelka Mohamed Salah, hase yeeshee waxa hadda diiraddeeda soo galay Jamal Musiala oo la sheegay in uu khilaaf u dhexeeyo Bayern Munich.
Sida uu qoray wargeyska Bild ee kasoo baxa waddanka Germany, Jamal Musiala ayaa joojiyey wada-hadallo cusub oo ay kooxdiisu doonaysay inay heshiiska ugu dheerayso, waxaana xaaladda Munich iyo Musiala uu wargeysku ku sheegay ‘mid aad halis u ah’.
Wargeyska ayaa intaa ku daray, in Liverpool ay qancinta Jamal Musiala u isticmaalayso xiddiga khadka dhexe ee reer Netherlands ee Ryan Gravenberch oo xagaagii ay kasoo iibsadeen Bayern Munich, kaas oo aanay haysanin waqtigii ay Reds doonayeen Jude Bellingham balse hadda ay heleen.
Gravenberch ayaa la sheegay in ay saaxiibbo yihiin Jamal Musiala oo uu ku qancin karayo in uu kula soo biiro Anfield, laakiin waa in marka hore uu isagu fursad fiican ka helo Anfield si uu ugu qancin karo Jamal Musiala inuu yimaaddo Liverpool.
Be the first to comment