Halyeygii Liverpool iyo xulka qaranka England ee Michael Owen ayaa saadaal dhamaystiran ka sameeyey horyaalka waddanka Ingiriiska ee Premier League ee xilli-ciyaareedka dhowaanta bilaabmaya, waxaana uu usii bushaareeyey hal koox oo uu sheegay inay ku guuleysan doonto horyaalka xilli-ciyaareedkan.
Waxa kale oo uu Michael Owen saadaaliyey afarta kooxood ee Ingiriiska uga soo qayb-geli doona tartanka Champions League ee xilli-ciyaareedka dambe ee kaalmaha ugu sarreeya kaga dhamaysan doona horyaalka toddobaadka dambe bilaabmi doona iyo saddexda kooxood ee ka dhici doona sallaanka Premier League.
Horyaalka Premier League oo xilli-ciyaareedkan la filayo inuu noqon doono mid si adag loogu dagaallami doono maadaama Arsenal, Chelsea iyo Manchester United ay is-xoojiyeen, sidoo kalena Manchester City ay tahay awoodda illaa hadda loogu cabsida badan yahay, balse Liverpool ay lumisay tababaraheedii Jurgen, ayaa waxa uu Michael Owen sii dhiibtay badheedhihiisa iyadoo aanu xilli-ciyaareedkuba bilaabmin.
Michael Owen waxa uu horyaalka Premier League u hibeeyey Arsenal oo 20 sannadood ka hor ay ugu dambaysay inay horyaalka ku guuleysato, isla markaana labadii sannadood ee ugu dambeeyey waqti dambe hoggaanka ay Man City kala wareegtay oo kaalinta labaad ku dhamaysatay.
Arsenal ayaa markii uu horyaalka siiyey, waxa uu Manchester City u riday kaalinta afraad ee miiska kala-sarraynta horyaalka Premier League, taas oo laga yaabo in dad badan ay saadaashani ku noqoto mid aan macquul ahayn.
Owen oo arrimahan ka hadlaya ayaa yidhi: “Arsenal iyo Manchester City ayaa cid walba ay ugu sarraysiinaysaa saadaasha afarta sare, waxayna ila tahay in Liverpool ay soo raaci doonto inkasta oo su’aalo la gelinayo sida uu Arne Slot u maamuli doono. Markii hore waxa aan u malaynayey in Newcastle ay iman karayso afarta sare, laakiin hadda waxa aan ka doorbidayaa Aston Villa oo ah koox adag oo haddana horumar samaynaysa.”
Michael Owen oo kala saarayay Arsenal iyo Manchester City ayaa yidhi: “Waxay ila tahay in layaab badan uu jiri doono xilli-ciyaareedkan. Waxay ila tahay in Arsenal ay ku guuleysan doonto horyaalka, Liverpool kaalinta labaad geli doonto, Aston Villa saddexaad noqon doonto, iyo Manchester City oo kaalinta afraad ku dhamaysan doonta.”
Michael Owen waxa kale oo uu heerka labaad inay u dhacayaan u saadaaliyey, saddexda naadi ee hadda soo dallacay ee Leicester City, Ipswich Town iyo Southampton.
Be the first to comment